Средба на српскиот претседател Вучиќ со Путин во Москва

САРАЕВО (АА) - Српскиот претседател Александар Вучиќ денес му изрази благодарност на рускиот претседател Владимир Путин за неговата огромна поддршка за територијалниот интегритет и суверенитет на Србија и нагласи дека заедничка задача на двете земји е да не дозволат ревизија на историјата, пренесува Анадолу.

На почетокот од средбата со Путин во Кремљ, Вучиќ му се заблагодари на рускиот претседател за гостопримството и уште еднаш му го честита празникот, 80-годишнината од победата во Големата татковинска војна.

„Тоа е многу важен ден и за нас, за Србите. Горди сме на улогата на нашиот народ во ослободувањето на нашата земја од нацистичките освојувачи и многу сме ѝ благодарни на Црвената армија, на Советската армија, за тоа што одигра голема улога во тоа ослободување“, рече Вучиќ обраќајќи се на руски јазик.

Тој додаде дека Путин дал исклучителен придонес во развојот на билатералните односи меѓу двете земји.

Вучиќ истакна дека улогата на Русија е важна и дека заедничка задача е да не се дозволи ревизија на историјата, додавајќи дека денешниот ден покажа дека заеднички треба да се работи на тоа.

„Ви благодарам уште еднаш за оваа прекрасна манифестација, величествената парада на која присуствувавме денес и се надевам дека ќе се видиме и во Србија и во Белград“, рече Вучиќ и додаде дека тој и делегацијата на Србија во Москва се чувствуваат како дома.