Фондацијата ФОЦИЦ реагираше против регистрацијата на Исламска селефиска заедница „Дар ел Хадис“ во РСМ

СКОПЈЕ

Регистрацијата на Исламска селефиска заедница „Дар ел Хадис“ од страна на суд во Република Северна Македонија, покрај противењето на Исламската верска заедница (ИВЗ), предизвика реакции и од граѓанското општество, пренесува Агенција Анадолија (АА).

Фондацијата Центар на исламска цивилизација (ФОЦИЦ) реагираше нарекувајќи го овој чин „раздорнички, одвратен и штетен за идентитетот и историјата на исламот во овие земји“.

Во реакцијата на Фондацијата ФОЦИЦ се наведува дека ИВЗ е чадорот во кој се наоѓа секој верник муслиман од овие простори, додавајќи дека неговата сенка е доволна и единствена за да го покрие секој што се идентификува со исламската вера.

„Оваа институција, без оглед кој ја водеше, беше и останува метафора на единството кон кое се стремиме за наши околности. Затоа, воспоставувањето паралелни исламски заедници, кои ќе му прават ривалство на ИВЗ на Северна Македонија, е само раздор, еден „Месџиду Дирар“, па дури и повеќе, воспоставување на друга заедница со „исламски“ атрибут е застрашувачки план на антимуслиманските кругови, познати по нивните агенди за поделба на муслиманската заедница и нејзино распарчување до распаѓање, што ќе го прават нејзиниот глас незначителен во нашиот простор“, се вели во реакцијата.

ФОЦИЦ потсетува и дека во Северна Македонија не е регистрирана ниту една „Македонска православна црква“ освен Македонската православна црква, со што бараат дерегистрација на салефистичката исламска заедница „Дар ел Хадис“.

„Преку ова писмо, водени само од исламска и интелектуална одговорност, ги замолуваме државните институции да ја дерегистрираат таа верска заедница и да не дозволуваат формирање на ниту една организација со името „исламска заедница“. Исто така, му се обраќаме и на претставникот и поддржувачите на истата, да се откажат од овие планови за поделби и да не станат маша за поделба на муслиманските верници“, нагласуваат од ФОЦИЦ.

Исто така, во реакцијата се наведува дека во спротивно, групата ќе остане запаметена како пропагатор на раздор и поделба „додека историјата на муслиманите од нашето поднебје секогаш ќе им суди како предавници на уметот“.

Потсетуваме дека Основниот суд Скопје 2 од Северна Македонија на 2 февруари ја регистрираше Исламска селефиска заедница „Дар ел Хадис“, а ИВЗ тоа го смета како обид за паралелизам на Уставниот институт на ИВЗ, при што ги презела сите потребни правни процедури, доставувајќи и жалба до Апелациониот суд за укинување на одлуката за регистрација.