Lina Altawell
02 Октомври 2026•Ажурирано: 02 Октомври 2026
Лидерот на израелската опозиција, Јаир Лапид, изјави дека се сретнал со група млади Израелци кои изразиле поддршка за убивање на сите Палестинци во Појасот Газа, вклучително и бебиња, пренесува Анадолу.
Лапид ги даде овие изјави во интервју за поткаст, чии делови деновиве се шират на социјалните мрежи.
„Имав тешка средба со група многу млади луѓе и од нив ги слушнав сите оние изјави во кои се повикува на убивање на сите и се тврди дека нема невини“, истакна Лапид.
Тој рече дека ги прашал: „Дури и бебињата?“
Како што рече Лапид, тие одговориле: „И бебињата, бидејќи на крајот ќе пораснат и ќе станат терористи“.
Од 8 октомври 2023 година, Израел, со поддршка од САД, спроведува геноцид во Појасот Газа, во кој се убиени повеќе од 74.000 Палестинци, а повредени се над 175.000, од кои повеќето се жени и деца.
Од почетокот на војната во Газа, израелските функционери и јавни личности даваат изјави во кои повикуваат на употреба на огромна сила против Палестинците и на минимизирање на разликата меѓу цивилите и борците.
- Критики за владините министри -
Лапид исто така упати критики за изјавите на владините министри, велејќи дека Израел „нема да закрепне“ ако дозволи министер да остане на функцијата откако повика на фрлање нуклеарна бомба врз Газа.
Министерот за наследство, Амихаи Елијаху, во ноември 2023 година повика на употреба на нуклеарно оружје врз Газа.
Лапид ги критикуваше и изјавите на израелските функционери во врска со изгладнувањето на цивилите во Газа, наведувајќи дека таквите изјави на министрите кои остануваат на функција му штетат на Израел.
Тој се осврна и на политиката на израелската Влада кон земјите што ја критикуваат, тврдејќи дека прекинувањето на врските или затворањето на амбасадите не е во интерес на Израел.
„Антиизраелската реторика во Ирска и Шпанија е неприфатлива, но ја доведувам во прашање корисноста од затворањето на израелската Амбасада во Даблин или отповикувањето на амбасадорот од Мадрид“, рече Лапид.
Тој изјави дека би претпочитал да отпатува во тие земји, да се појави во нивните медиуми и да разговара со критичарите на Израел, наместо да ги бојкотира.
