Ekip
17 Ноември 2022•Ажурирај: 18 Ноември 2022
ЛОНДОН (АА) - На Финска до 2050 година ќе ѝ требаат над 50.000 имигранти годишно за пополнување на слободните работни места поради стареењето на популацијата, пренесува Агенција Анадолија (АА).
„Финска станува сè постара и позадолжена, а нашиот однос кон економската одржливост се превртува наопаку“, истакна Јако Ескола, претседател на „Технолоџи Финланд“.
Асоцијацијата од околу 1.800 компании од технолошката индустрија, исто така, истакнува и дека само на технолошката индустрија ќе ѝ бидат потребни 130.000 нови експерти во следните десет години.
Се смета дека во следните десет години ќе има десетици илјади слободни работни места во индустриите кои извезуваат.
Ескола предупреди дека социјалата на државата нема да може да се одржи ако Финска нема доволно работоспособни луѓе.
„Затоа, единствената опција е значително да се зголеми имиграцијата“, порача тој.
Ескола нагласи дека Финска мора да изгради успешна долгорочна имиграциска политика.
Но, посочи дека само тоа не е доволно за да се решат предизвиците со кои се соочува земјата.
Ескола додаде дека од суштинско значење е подигнувањето на нивото на вештините и обученоста на младите, особено на полето на информатичката и комуникациската технологија.
