Халал експо 2025 ќе ги собере глобалните актери во прехранбениот сектор во Истанбул

ИСТАНБУЛ (АА) - Додека Халал експо 2025 се подготвува да ги собере глобалните играчи во Истанбул, во рамките на саемот ќе се отвори специјален простор за храната H-FOOD, што ќе биде лансирана како дел од саемот, отворајќи нови врати за трговија за турските компании, известува Анадолу.

Според соопштението што го објави Советот на Светскиот халал-самит, 11-тиот Светски халал-самит, кој го обединува халал-екосистемот на глобално ниво и е меѓу водечките светски организации во ова поле, ќе се одржи во Истанбул од 26 до 29 ноември.

Во рамките на Самитот, на кој Агенцијата Анадолу (АА) ќе биде глобален комуникациски партнер, ќе се одржи и Халал експо 2025. Настанот, со специјалниот простор за храна H-FOOD, на едно место ќе ги собере глобалните актери на ова поле и ќе обезбеди нова перспектива за турските компании кои работат во прехранбениот сектор.

Настанот, што ќе се одржи во Истанбулскиот изложбен центар, ќе собере илјадници професионалци од индустријата, вклучувајќи производители на храна и сопственици на брендови, увозници и извозници, како и набавувачи на амбалажа, логистика и прехранбена технологија.

- Побарувачката за халал-храна секојдневно се зголемува

Според дадените информации, додека побарувачката за безбедна храна се зголемува секојдневно низ целиот свет, глобалните актери преземаат важни чекори кон нови соработки.

Со зголемувањето на глобалната побарувачка за чиста, безбедна и хигиенска храна, компаниите што делуваат во Турција имаат за цел да го прошират својот пазарен удел преку нови партнерства. Со неодамнешните иновации, екосистемот за храна сега е достапен за потрошувачите со широка палета на производи, а пазарот на халал продолжува брзо да расте.

Иако извештајот на Организацијата за храна и земјоделство на ОН открива дека ќе има значително зголемување на глобалното производство и трговија со прехранбени производи, се наведува дека климата, трошоците за влезни материјали, трговските политики и технолошкиот развој ќе играат важна улога во иднината на пазарот на храна во периодот 2025-2034 година.

- Се очекува пазарот на халал-храна да надмине 5 трилиони долари

Се предвидува дека целната публика на пазарот на халал-производи ќе достигне 3,6 милијарди луѓе во наредните години, додека глобалниот пазар на халал-храна, кој моментално вреди околу 2 трилиони долари, се очекува да надмине 5 трилиони долари до 2032 година. Се очекува турските компании кои сакаат да ја зголемат разновидноста на производи на пазарот во рамките на глобалниот халал-екосистем да воспостават нови партнерства со глобалните актери на ова поле и да достигнат повисоки бројки на производство во иднина.

Пазарот на халал-храна, кој во последно време брзо расте и нуди нови можности за компаниите, се проширува и во други земји. Побарувачката за халал-храна од страна на бројни земји, вклучувајќи ги Саудиска Арабија, Обединетите Арапски Емирати, Катар, Кувајт, Египет, Алжир, Мароко, Индонезија, Малезија, Палестина, Пакистан, Узбекистан, Туркменистан, Германија, Русија, Босна и Херцеговина, Белгија, Унгарија, Романија, Словачка, Украина, Обединетото Кралство, Франција, Нигерија, Кенија и Јужна Африка, претставува значајни можности за Турција.