ТЕХНОФЕСТ привлече 225.000 посетители во Лефкоша

ИСТАНБУЛ (АА) – Околу 225.000 луѓе присуствуваа на ТЕХНОФЕСТ, водечки турски фестивал за технологија, воздухопловство и вселена, кој се одржа викендов во Турската Република Северен Кипар (ТРСК), јавува Анадолу.

Фестивалот започна во четврток на стариот аеродром „Ерџан“ во Лефкоша, главниот град на ТРСК, под покровителство на Претседателството на таа држава.

Настанот понуди богата програма со натпревари, воздушни акробации, изложби и работилници.

„ТЕХНОФЕСТ не е само технолошки натпревар. ТЕХНОФЕСТ е приказна за будење на една нација“, рече Селџук Бајрактар, раководител на настанот, на вчерашната церемонија на затворањето.

„Тука се гради самоуверена генерација. Овој пат не е лесен - ќе има пречки пред нас - но никогаш нема да застанеме“, додаде тој.

Следното издание на фестивалот ќе се одржи во септември во Истанбул.

Министерот за индустрија и технологија на Туркије, Мехмет Фатих Качир, истакна дека ТРСК има цел да стане ИТ-центар што нуди услуги на глобално ниво, а ТЕХНОФЕСТ ја одразува токму таа визија.

Организиран од Фондацијата на Турскиот технолошки тим (Т3) и Министерството за индустрија и технологија на Турција, ТЕХНОФЕСТ од 2018 година се одржува секоја година со поддршка од десетици владини агенции, приватни компании и универзитети.

Анадолу и понатаму е глобален комуникациски партнер на фестивалот.

Традиционално, ТЕХНОФЕСТ се одржува во различни турски градови во парни години, а во Истанбул во непарни.

По Азербејџан во 2022 година ТРСК е втор меѓународен домаќин на фестивалот.

Во 2024 година фестивалот во турскиот град Адана собра околу 1,1 милион посетители.