Американец по 48 години минати во затвор прогласен за невин и пуштен на слобода

ОКЛАХОМА СИТИ (АА) - Судот во Оклахома го ослободи од вина Глин Симонс, кој беше во затвор речиси 50 години, откако е утврдено дека не е виновен, известува Анадолу.

Судијата на Окружниот суд во Оклахома, Еми Палумбо, пресуди дека 71-годишниот Глин Симонс, кој мина повеќе од 48 години во затвор поради обвинение за убиство, не е виновен.

„Нашиот суд пронајде јасни и уверливи докази дека Симонс не го сторил злосторството за кое е осуден“, наведе Палумбо.

Глин Симонс во 1975 година е осуден на смртна казна поради убиството на Керолин Сју Роџерс во 1974 година, а казната подоцна е заменета со доживотна робија.

Симонс и кообвинетиот Дон Робертс беа осудени на смрт. Казните подоцна се намалени на доживотен затвор.

Симонс влезе во историјата како затвореник со најдолг стаж на „недолжно обвинет“ во САД.