„При убиството на Ким Џонг-нам е користен нервен агенс VX"

КУАЛА ЛУМПУР (АА) - Малезиската полиција објави дека при убиството на Ким Џонг-нам, полубрат на севернокорејскиот лидер Ким Џонг-ун, бил користен високо отровниот нервен агенс познат како VX, пренесува Anadolu Agency (AA).

„Првичната анализа на сувите брисови земени од слузницата на очите и лицето на Џонг-нам ја откри супстанцијата О-етил-S-2-диизопропиламиноетилметилфосфонат или VX“, изјави Калед Абу Бакар, генерален инспектор на малезиската полиција.

VX е силно хемиско оружје што Обединетите нации го опиша како оружје за масовно уништување. Само една капка на кожата може да биде фатална по животот на човекот.

Неговото производство и складирање во количини поголеми од 100 грама е забрането со Конвенцијата за хемиско оружје од 1993 година.

Абу Бакар во средата изјави дека две странски државјанки од Индонезија и од Виетнам, кои се осомничени дека го извршиле убиството на аеродромот во Куала Лумпур, биле обучени да го извршат убиството така што рацете премачкани со отров ги избришале од лицето на Џонг-нам.

Малезија официјално побара од Интерпол да распише потерница за четворица државјани од Северна Кореја осомничени дека се вмешани во убиството.