САД: Бројот на загинати од ураганот Ијан се искачи на 87

ФЛОРИДА (АА) - Бројот на загинати од ураганот Ијан, кој ја погоди американската држава Флорида, се зголеми на 87, од кои 83 на Флорида и четири во Северна Каролина, јавува Агенција Анадолија (АА).

Ураганот Ијан, кој на 28 септември го зафати јужниот брег на Соединетите Американски Држави со јачина од четврта категорија, еден ден по Јужна Каролина, се претвори во тропска дождовна бура што ги зафати сојузните држави Џорџија, Северна Каролина и Вирџинија.

Бројот на загинатите од ураганот Ијан, кој зад себе остави големи разурнувања на Флорида, изнесува 83. Соопштено е дека четири лица ги загубија животите во Северна Каролина.

Продолжуваат напорите за пребарување и спасување на лицата под остатоците предизвикани од ураганот, а се стравува дека бројот на жртви може да биде поголем.

Ураганските бранови, високи до 12 метри, поплавија делови од западниот брег на Флорида, уништувајќи домови и деловни објекти и предизвикувајќи голема материјална штета.

На јужниот брег на САД околу 800.000 домови и деловни објекти останале без струја.

Жителите на Флорида, наводно, почнале да се враќаат во своите домови за да ја исчистат калта. Штетата што ја предизвика ураганот само во државата Флорида се проценува на повеќе од 47 милијарди долари.

Се известува дека некои компании проценуваат дека осигурената штета може да достигне 60 милијарди долари, додека вкупната штета би можела да достигне 100 милијарди долари.

Американскиот претседател Џо Бајден во четвртокот изјави дека ураганот Ијан „може да биде најсмртоносниот“ во историјата на земјата.

„Ова би можел да биде најсмртоносниот ураган во историјата на Флорида. Бројките се сè уште нецелосни, но слушаме рани извештаи, што може да претставува значителна загуба на животи“, рече Бајден.

Се очекува претседателот и првата дама Џил Бајден да отпатуваат во Флорида.