Шангајската организација за соработка повика на прекин на огнот во Газа и „праведно решение“ за палестинското прашање

ИСТАНБУЛ (АА) - Лидерите на Шангајската организација за соработка (ШОС) денес изразија „длабока загриженост“ поради континуираната ескалација на израелско-палестинскиот конфликт и катастрофалната хуманитарна ситуација во Газа, јавува Анадолу.

Тие, исто така, „остро ги осудија дејствата што доведоа до многубројни жртви меѓу цивилното население“, според заедничката декларација издадена по 25. Самит на шефовите на држави и влади на ШОС во северниот кинески пристаништен град Тјанџин.

Земјите членки на ШОС „ја нагласија потребата од постигнување сеопфатен и траен прекин на огнот колку што е можно поскоро, обезбедување влез на хуманитарната помош во Газа и зголемување на напорите за обезбедување мир, стабилност и безбедност за жителите во регионот“.

Тие истакнаа дека „единствен начин да се обезбедат мир и стабилност на Блискиот Исток е сеопфатно и праведно решение за палестинското прашање“, се наведува во Декларацијата од Тјанџин.

Кина беше домаќин на дводневниот самит во Тјанџин, каде што раководството на ШОС усвои 10-годишен план за развој и се согласи да ги зајакне економските и безбедносните врски.

Изјавата на блокот дојде откако денес бројот на жртви во Газа се искачи на 63.557 во геноцидната војна на Израел во Појасот Газа која започна во октомври 2023 година.

Според Министерството за здравство во Газа, бројот на повредени Палестинци се искачи на 160.660.

Од 2 март израелските власти целосно ги затворија сите гранични премини во Газа, втурнувајќи во глад 2,4 милиони жители на територијата.

Процената за безбедноста на храната поддржана од ОН веќе го потврди гладот ​​во северна Газа и очекува тој да се прошири подалеку на југ до крајот на септември.

Израелската армија ги продолжи нападите врз Појасот Газа на 18 март и оттогаш уби 11.426 Палестинци, а повредени се 48.619, со што го прекрши договорот за прекин на огнот и размена на затвореници што стапи на сила во јануари.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.