50.000 потписници бараат построга контрола на центрите за податоци во Финска

Граѓанската иницијатива со која се бара построга контрола на центрите за податоци во Финска денес го достигна потребниот праг од 50.000 потписи, објави радиодифузерот „Јле“, пренесува Анадолу.

Петицијата, која беше започната во вторникот, се очекува да биде проследена до Парламентот, каде што ќе биде разгледана од пратениците.

Иницијативата следува по најавата на „Гугл“ минатата недела дека во наредните години ќе ги прошири своите операции поврзани со центрите за податоци во Финска.

Потписниците побараа од Владата да воведе услови за приклучувањето на центрите за податоци на финската електроенергетска мрежа и нивното работење во рамките на мрежата, „земајќи го предвид капацитетот на електроенергетската мрежа, задолжителното резервно напојување и искористувањето на отпадната топлина“.

Тие исто така побараа воведување посебна такса за центрите за податоци, заснована на „штетата врз животната средина предизвикана од работењето и искористените ресурси (вклучително и електрична енергија, вода и користење на земјиште)“.

Во иницијативата се наведува дека мерките би помогнале цените на енергијата да останат достапни за домаќинствата и другите индустрии.