Michael Hernandez
28 Август 2019•Ажурирај: 28 Август 2019
ВАШИНГТОН (АА) - Администрацијата на Трамп пренасочува 271 милион американски долари од Министерството за внатрешна безбедност, вклучувајќи ги и средствата за помош при катастрофи, за да ги финансира местата за имиграциски притвор, како и местата за сослушување, јавува Anadolu Agency (AA).
„Тоа вклучува 155 милиони долари што ќе бидат извлечени од Федералната агенција за управување со вонредни состојби (FEMA) за да се покријат трошоците за привремените судски сослушувања за барателите на азил, кои администрацијата ги присили да чекаат во Мексико“, се вели во писмото напишано од конгресменката Лусил Ројбал-Алард до вршителот на должноста челник на Министерството за внатрешна безбедност.
Дополнителни 116 милиони американски долари од буџетот на Министерството, под кое спаѓа ФЕМА, ќе бидат распределени за финансирање на дополнителни кревети за притворните центри на американската Служба за имиграција и царина (ICE).
Конгресот бил известен за пренамените, кои не биле побарани, бидејќи администрацијата вели дека ги пренаменува средствата затоа што федералните законодавци не ја вклучиле распределбата на средства за кревети во нацрт-законот за вонредни трошоци за јужната граница, донесен во јуни.
Американскиот претседател, Доналд Трамп, го потпиша нацрт-законот на 1 јули.
„116 милиони долари финансии од Министерството за домашна безбедност претходно беа префрлени за операциите на Крајбрежната стража и за кибербезбедноста“, се вели во писмото на конгресменката.
Пренасочувањето на средствата доаѓа во услови кога тропската бура „Доријан“ се приближува кон Порторико, инаку територија на САД што беше опустошена од ураганот „Марија“ во 2017 година, која уште се обидува да ги надмине загубите од причинетата штета.
