Анкета: Само 3 отсто од украинските бегалци во Австрија планираат да се вратат во татковината

ЖЕНЕВА (АА) - Истражувањето објавено денес од страна на Австрискиот фонд за интеграции (OIF) покажува дека поголемиот дел Украинци кои побегнале во Австрија од Украина не планираат да се вратат во својата земја, јавува Анадолу.

Според Австрискиот фонд, само 3 отсто од испитаниците посочиле дека имаат конкретни планови за враќање, што е значително понизок процент отколку во 2022 година (30 %) и 2023 година (13 %).

Истражувањето покажува дека 56 отсто од испитаниците во моментов не сакаат да се вратат, 12 отсто одговориле дека би сакале да се вратат во Украина во одреден момент, а други 29 отсто се изјасниле дека не се сигурни дали воопшто сакаат да се вратат.

Истражувањето покажа и дека 44 отсто од испитаниците во Австрија се моментално вработени. Според Фондот, споредбените податоци од претходните години покажуваат јасно зголемување на бројот на Украинки.

Според статистичките податоци, само 10 отсто од Украинките биле вработени во 2022 година, а оваа година тој процент се зголемил на 43.

Австрискиот фонд за интеграции (OIF), австриска федерална власт која работи на интегрирање на мигрантите, вели дека 75 отсто од оние кои учествувале во истражувањето имаат високо образование и напредни квалификации во широк опсег на сектори.

Според организацијата, во моментов во Австрија живеат околу 78.000 украински бегалци.

Австрискиот фонд за интеграции е основан во 1960 година од страна на Високиот комесаријат на Обединетите нации за бегалци (УНХЦР) и федералното Министерство за внатрешни работи, како и од Фондот за бегалци на Обединетите нации.