Билансот на загинати мигранти во бродоломот кај јужна Италија порасна на 70

ИСТАНБУЛ (АА) - Бројот на загинати мигранти во бродската несреќа во близина на јужна Италија се искачи на 70, пренесува Анадолу.

Италијанската новинска агенција АНСА објави дека телото на уште едно дете е пронајдено денес кај калабрискиот град Кутро.

„Телото на момче, очигледно на возраст од 12 или 13 години, е пронајдено на плажата Ботричело, на околу 10 километри од каде што [дрвен] рибарски брод со околу 200 мигранти се распадна во разбрануваното море минатата недела“, објави агенцијата.

Претходно вчера, властите пронајдоа тело на друго дете на околу 3-годишна возраст во водите недалеку од Кутро, а во веста се додава дека во несреќата загинале најмалку 16 малолетници.

Несреќата ја преживеаја најмалку 80 луѓе.

Полициските извештаи проценуваат дека меѓу 27 и 47 лица се исчезнати.

Италијанската премиерка Џорџа Мелони, која престојува во официјална посета на Абу Даби, ги отфрли наводите дека нејзината влада на одреден начин „ги попречила операциите што би ги спасиле жртвите“, објави АНСА.

Мелони размислува да го одржи „следниот состанок на Владата во Кутро, градот близу кој се случи катастрофата, и да го стави фокусот на миграцијата“.

„Мелони повтори дека италијанските власти не добиле предупредување од граничната агенција на ЕУ, Фронтекс, дека рибарскиот брод на кој се наоѓале мигранти, а кој се распадна во немирното море, бил во неволја“, се додава.

Започната е истрага за да се утврди дали спасувачките напори биле одложени од небрежност.