Весникот „Хаарец“: Израелските војници користат цивили како жив штит додека ги пребаруваат тунелите и зградите во Газа

КУДС (ЕРУСАЛИМ) (АА) - Израелската војска користеше палестински цивили како жив штит додека ги пребаруваше тунелите и зградите во Појасот Газа против можни замки, објавија израелските медиуми, пренесува Анадолу.

Израелскиот весник „Хаарец“ објави текст во кој се наведува дека израелската војска „систематски“ ги користела цивилите во Појасот Газа како жив штит при пребарувањето на тунелите и зградите, со знаење на началникот на Генералштабот Херци Халеви и високи воени офицери.

Според изјавите на некои војници и команданти во израелската војска, израелските војници без никакво оправдување заробиле палестинска младина во Појасот Газа и ја користеле како жив штит при пребарување на куќите и тунелите.

Според сведоштвата, палестински млади, обично во своите дваесетти години, биле облечени во израелски воени униформи, рацете им биле врзани зад грб и биле испраќани во зградите и тунелите. Но, забележано е дека по внимателната проверка можело да се заклучи дека овие мажи се Палестинци по нивните патики и стравот и болката на нивните лица.

Во вестите се наведува дека заробените Палестинци од единиците на израелската војска биле користени како жив штит во операциите и дека пред израелските сили тие влегувале во зградите и тунелите.

„Ни говореа дека нашите животи се поважни од нивните животи (на Палестинците, заб. ав.), дека е подобро тие да бидат разнесени со експлозив отколку да загинат наши војници“, се наведува во изјавите на неименувани израелски војници.