Emirhan Demir
28 Јули 2025•Ажурирај: 29 Јули 2025
АНКАРА (АА) - Американските демократски сенатори побараа администрацијата на претседателот Доналд Трамп да го запре финансирањето на Фондацијата за хуманитарна помош во Газа (GHF), наводно организација за помош поддржана од Израел и САД, известува Анадолу.
Сенаторот Крис Ван Холен и 20 негови демократски колеги напишаа писмо до американскиот државен секретар Марко Рубио.
Во писмото се изразува длабока загриженост за финансиската поддршка на САД за ГХФ, која придонесе за убивањето цивили кои чекаа хуманитарна помош во храна во Газа.
Во писмото, во кое се наведува дека ГХФ е во центарот на контроверзии уште од своето основање, се бара итно прекинување на финансирањето и враќање на механизмите за дистрибуција на помош координирани од ОН.
Сенаторите во писмото наведуваат дека откако ГХФ започнала со своите операции, стотици луѓе на кои им е потребна помош во храна се убиени во т.н. зони за дистрибуција на помош, илјадници се повредени, а за да пристапат до помошта, луѓето се принудени да патуваат долго време.
Потсетувајќи дека Министерството за надворешни работи издвоило 30 милиони долари за финансирање на ГХФ во јуни, се бара објавување на сите релевантни документи, вклучувајќи ја и апликацијата за финансирање на организацијата и лицата кои го одобриле тоа.
Појасот Газа се наоѓа под интензивни израелски напади и строга опсада што го ограничува влезот на хуманитарната помош. Оваа палестинска енклава доживува хуманитарна катастрофа, со широко распространет глад и недостаток на вода, лекови, медицински материјали и хигиенски средства. Последните денови во пораст се смртните случаи предизвикани од глад во Појасот Газа, особено кај децата.
Од 27 мај, 1.021 лице се убиени, а 7.485 се повредени во систематските напади насочени кон Палестинците врз локациите на кои се дистрибуира помош формирани од Фондацијата за хуманитарна помош за Газа (GHF) предводена од Израел и САД под маската на хуманитарна помош.
