Документите за Епштајн откриваат електронска преписка со банкарка од семејството Ротшилд за тврдења поврзани со Хитлер

ИСТАНБУЛ (АА) – Новообјавените документи поврзани со Џефри Епштајн откриваат електронска преписка меѓу него и банкарката Аријан де Ротшилд, во која се дискутираат тврдења дека Адолф Хитлер во младоста живеел во засолниште за бездомници, наводно финансирано од семејствата Епштајн и Ротшилд, пренесува Анадолу.

Корисникот @AdameMedia на американската социјална мрежа Х објави фотографија од размена на електронска пошта од 31 декември 2018 година меѓу Епштајн и Де Ротшилд. Во пораките стојат тврдења дека Хитлер, во раните години, престојувал во засолниште за сиромашни, финансирано од три богати еврејски семејства.

Де Ротшилд ја отфрли таа приказна како теорија на заговор, додека Епштајн тврдел дека таа е точна.

„Мислев дека ќе ви биде забавно што на час на Харвард за Хитлер ја раскажале приказната кога бил толку сиромашен што живеел во засолниште за бездомници… кое било финансирано од три богати семејства. Гутман, Епштајн и Ротшилд. Се покажа дека е точно“, напишал Епштајн.

Во својот одговор, Де Ротшилд напишала:

„Без разлика дали тоа е начин да се каже дека великодушноста не е наградена или дека теоријата на заговор сè уште постои, тоа е навистина патетично“.

Епштајн потоа повторно ги потврдил своите тврдења.

„Се покажува дека е 100 отсто точно. Хитлер ги продавал своите алишта и уметнички дела и живеел во засолниште финансирано од Евреи – Епштајн, Ротшилд и Гутман. Нема заговор“, напишал тој.

Документите исто така укажуваат на деловни односи меѓу Епштајн и семејството Ротшилд.

Според документ од 5 октомври 2015 година, Епштајн, преку компанијата „Southern Trust Company Inc.“, склучил договор со Групацијата Ротшилд во вредност од 25 милиони долари.

Договорот опфаќал услуги поврзани со анализа на ризик и алгоритми, при што Епштајн бил наведен како претседател на компанијата, со седиште на американските Девствени Острови.

Епштајн беше пронајден мртов во затворска ќелија во Њујорк на 10 август 2019 година, додека го очекуваше судењето. Тој се соочуваше со федерални обвиненија за водење мрежа за сексуална трговија со малолетни девојчиња и жени.