Елон Маск го комплетира купувањето на Твитер и отпушти директори

ВАШИНГТОН (АА) - Извршниот директор на „Тесла“, Илон Маск, го заврши купувањето на Твитер за 44 милијарди долари и отпушти тројца клучни директори од компанијата подготвувајќи се да зацрта нов курс за веб-страницата за микроблогирање, јавува Агенција Анадолија (АА).

Покрај комплетирањето на договорот и додавањето на уште една компанија во неговото богато технолошко портфолио, Маск го зеде Твитер како приватна сопственост, плаќајќи им ја на акционерите првичната цена од 54,20 долари по акција.

„Главниот извршен директор Параг Агравал, главниот финансиски директор Нед Сегал и Виџаја Гаде, шефот за правна политика и безбедност, се отпуштени“, објави весникот „Вашингтон пост“ (Washington Post), повикувајќи се на тројца анонимни извори кои го споделиле тоа под услов на анонимност. Според весникот, отпуштен е и генералниот советник на Твитер, Шон Еџет.

Комплетирањето на договорот ги доведе до крајот правните дејствија од Твитер кои имаа за цел Маск да ја заврши својата понуда откако се обиде да се повлече од договорот.

Маск вчера сигнализира дека договорот ќе биде комплетиран за кратко време, менувајќи го неговото „Био“ на Твитер во „Chief Twit“ и напиша долга, според стандардите на Твитер, порака до огласувачите дека не сака веб-страницата да стане „бесплатна за сите“.

Маск одамна зазеде построг пристап кон слободата на говорот, но во пораката упатена кон огласувачите, тој вети дека ќе ја продолжи политиката на Твитер за контрола на различните содржини, вклучително и на говорот на омраза и заканите за насилство.

„Причината поради која го купив Твитер е затоа што за иднината на цивилизацијата е важно да има заеднички дигитален „градски плоштад“, каде што може да се дебатира за широк спектар на верувања на здрав начин, без прибегнување кон насилство“, напиша Маск.

„Во моментов постои голема опасност социјалните медиуми да се поделат на екстремно десничарски и крајно левичарски кои ќе генерираат повеќе омраза и ќе го поделат нашето општество“, додаде тој.

Се зголеми загриженоста дека ако Маск го купи Твитер, тој ќе ги намали или отфрли напорите за ублажување на содржината, особено на говорот на омраза, што веројатно ќе остави многу огласувачи да се борат за излез заедно со секојдневните корисници.

Обраќајќи им се директно на огласувачите, Маск рече дека смета „дека рекламирањето, кога се прави на правилен начин, може да воодушеви, забавува и информира; може да ви прикаже услуга или производ или медицински третман за кој никогаш не сте знаеле дека постои, но е вистински за вас“.

„За ова да биде вистинито, од суштинско значење е на корисниците на Твитер да им се покаже рекламирање што е можно порелевантно за нивните потреби“, напиша тој. „Твитер се стреми да биде најпочитуваната рекламна платформа во светот која го зајакнува вашиот бренд и го развива вашето претпријатие. На сите што соработувавте со нас, ви благодарам. Дозволете ни да изградиме нешто извонредно заедно“, додаде Маск.

Правните постапки се во тек во американската сојузна држава Делавер, каде што судијката на странките им даде рок до денеска во 17 часот за затворање на договорот или соочување со судење во ноември за понатамошен исход.