Melike Pala
18 Ноември 2025•Ажурирај: 19 Ноември 2025
БРИСЕЛ (АА) – Европската Унија (ЕУ) денес повтори дека цврсто се противи на какви било обиди за демографски или територијални промени во Појасот Газа, по медиумските извештаи дека минатата недела палестински бегалци пристигнале во Јоханесбург, Јужноафриканската Република, јавува Анадолу.
Минатиот четврток Јужноафриканската Република одобри 90-дневно визно изземање за 153 Палестинци кои допатувале од Кенија барајќи азил, откако првично им бил одбиен влез поради недостиг на патни документи и вообичаени печати за излез во пасошите.
Според израелскиот дневен весник „Хаарец“, асоцијација предводена од човек со двојно израелско-естонско државјанство им продава авионски билети на Палестинците од Газа за чартер-летови кон далечни дестинации, како Индонезија, Малезија и Јужноафриканската Република, по цена од околу 2.000 долари.
Министерот за надворешни работи на Јужноафриканската Република, Роналд Ламола, вчера изјави дека доаѓањето на авион со палестински бегалци во Јоханесбург минатата недела било „јасно организирана операција“ со цел раселување на Палестинците.
Претходно Израел разговарал со неколку земји, меѓу кои и Јужен Судан, за можноста за релокација на Палестинци.
Портпаролот на Европската комисија, Ануар Ел Ануни, на прес-конференцијата во Брисел изјави дека „не е запознаен со овие извештаи“, но нагласи дека ставот на Унијата „останува непроменет“.
„ЕУ ги отфрла сите обиди за демографски или територијални промени во Појасот Газа и го поддржуваме обединувањето на Појасот Газа со Западниот Брег под палестинската управа“, рече тој.
Ел Ануни, исто така, се потсети на забелешките на претседателката на Европската комисија, Урсула фон дер Лајен, истакнувајќи дека „таа рекла оти Газа е суштински дел од идната палестинска држава и дека не треба да има натамошно присилно раселување“.
Портпаролката Паула Пињо рече дека ситуацијата ќе биде дополнително испитана.
„Веќе утринава видов некои извештаи за тоа. Треба подетално да ги разгледаме. Не сум сигурна дали станува збор за присилно или доброволно раселување“, рече таа.
