Зеленски: 62 отсто од руските ракетни напади се врз украински цивилни цели

КИЕВ (АА) - Околу 62 отсто од руските ракетни напади врз Украина биле врз цивилни цели, истакна украинскиот претседател Владимир Зеленски, јавува Агенција Анадолија (АА).

Голем број украински градови, гратчиња, села и населби се тешко оштетени во руските напади, рече Зеленски на конференција во главниот град Киев.

Руските проектили „конкретно гаѓаа цивилни цели“, а руските сили продолжуваат да убиваат украински цивили, додаде тој.

Истакна дека се пронајдени комори за измачување и масовни гробници во украинските области што украинските војници ги повратија од руските сили.

„Злосторствата извршени од руската држава на украинска територија, особено против Украинците, се без преседан од периодот на Втората светска војна“, додаде Зеленски.

Тој нагласи дека Украина очекува нејзините меѓународни партнери да ги поддржат нејзините напори Русија да биде изнесена пред лицето на правдата за нејзините злосторства.