Зошто агентите на ФБИ извршија рација во резиденцијата на Доналд Трамп во Мар-а-Лаго?

ИСТАНБУЛ (АА) - Поранешниот американски претседател Доналд Трамп соопшти дека неговата резиденција Мар-а-Лаго на Флорида била претресена од агентите на ФБИ вчера, што го натерало да се осврне на, како што го нарече, невидениот „напад“, обвинувајќи ги неговите политички противници за користење на правосудниот систем како „оружје“, пишува Агенција Анадолија (АА).

Но, зошто ФБИ изврши претрес на домот на Трамп на Флорида, дури отишле толку далеку што, според наводите, отвориле еден од неговите сефови? Кои се обвинувањата со кои се соочува поранешниот американски претседател?

ФБИ и Министерството за правда досега одбија да коментираат за оваа рација, но веќе имаше неколку случаи против Трамп, вклучително и неговото наводно лошо постапување и неовластено земање доверливи и официјални документи.

Повеќе американски медиуми објавија дека потрагата се чини била фокусирана на материјали како што се кутии со доверливи документи што Трамп ги донел со себе во Мар-а-Лаго кога ја напуштил Белата куќа минатиот јануари, па дури и пред да му заврши мандатот.

„Си-ен-ен“ цитираше три лица запознаени со ситуацијата, велејќи дека налогот за претрес на ФБИ бил дел од истрагата за „начинот на користење на претседателските документи, вклучително и доверливи документи“.

„Њујорк тајмс“, исто така, цитираше неколкумина луѓе запознаени со истрагата, велејќи дека потрагата се фокусирала на материјалот што Трамп го донел во приватниот клуб Мар-а-Лаго кога ја напуштил Белата куќа.

Ерик Трамп, еден од синовите на поранешниот претседател, за „Фокс њуз“ изјави дека претресот на ФБИ бил поврзан со документи земени од Белата куќа.

„Целта на рацијата, според она што тие го рекоа, била затоа што Националниот архив сакаше да потврди дали Доналд Трамп поседувал документи или не“, рече Ерик Трамп.

Поранешниот американски претседател моментално се соочува со неколку истраги и тужби, вклучително и во врска со исчезнатите документи од Белата куќа и упадот во американскиот Капитол на 6 јануари 2021 година.

- Национален архив на САД -

Управата на националниот архив на САД овој јануари презеде 15 кутии со документи на Белата куќа од резиденцијата на Трамп во Мар-а-Лаго, што требало да бидат предадени на Управата кога тој ја напуштил Белата куќа.

Подоцна го извести американскиот Конгрес дека кутиите содржеле „предмети означени како доверливи информации за националната безбедност“.

„Претставниците на поранешниот претседател Трамп ја информираа НАРА дека продолжуваат да бараат дополнителни претседателски документи што припаѓаат на Националниот архив“, се вели во соопштението на Управата за национален архив и записи (НАРА) во февруари.

Поранешни соработници на Трамп во февруари за неколку американски медиуми, меѓу кои е и „Вашингтон пост“, изјавија дека кутиите содржеле „спомени, подароци, писма од светските лидери и други преписки“, негирајќи каква било „лоша намера“.

Според Законот за претседателска евиденција што Конгресот го донесе во 1978 година по скандалот „Вотергејт“ на претседателот Ричард Никсон, сите претседателски досиеја се јавна сопственост и треба да бидат предадени на Националниот архив по завршувањето на мандатот на претседателот.

Претресот не значи дека Трамп е обвинет за кривично дело.

За да го изврши претресот, ФБИ морал да го убеди судијата дека причината за претресот е тоа што Трамп веројатно незаконски зел државни документи и дека не постои веројатност дека поранешниот претседател доброволно, сам ќе ги предаде документите. Во тој случај судијата издава налог за претрес.

Исто така, речиси е сигурно дека високи претставници во Министерството за правда, вклучително и јавниот обвинител Мерик Гарланд, би морале да одобрат претрес на резиденцијата на поранешниот претседател, што е без преседан во историјата на САД.

Дури и ако претресот бил овластен врз основа на наводите за неправилно постапување со државни документи, доколку доказите се појавеа за време на претресот со другите случаи поврзани со Трамп – како што се нападите на 6 јануари или шемата за „лажни електори“ за незаконско давање изборни гласови за Трамп од сојузните држави што не ги освои - тие докази би можеле да се соберат и да се користат од обвинителите кои ги следат другите случаи.