Asiye Latife Yılmaz
13 Февруари 2025•Ажурирај: 14 Февруари 2025
ИСТАНБУЛ (АА) - 2024 година важи за најсмртоносна година за новинарите со најмалку 124 убиени новинари, од кои речиси две третини во нападите поврзани со Израел, се вели во извештајот на Комисијата за заштита на новинарите (CPJ), јавува Анадолу.
Во извештајот објавен вчера се нагласува дека зачестеноста на глобалните конфликти, политички, криминални или воени, е двојно зголемена во последните пет години, што доведе до значителен пораст на смртните случаи на новинари во земји како Судан, Пакистан и Мјанмар.
Најголемо влијание врз медиумите е рекордниот број на новинари и медиумски работници убиени во конфликтот меѓу Израел и Газа, со 85 смртни случаи во 2024 година и 78 во 2023 година.
„Новинарите се сметаат за цивили во меѓународното хуманитарно право и нивното нишанење при конфликти е воено злосторство“, се наведува во извештајот.
Исто така се истакнува дека убивањето новинари и медиумски работници ги потенцира растечките опасности со кои се соочуваат медиумите и зголемената закана за протокот на информации низ светот.
„Условите можат да станат посмртоносни за медиумите кога оние што убиваат новинари не се повикани на одговорност. А помалку новинари значат помалку информации за граѓаните кои ја бараат вистината“, се вели во извештајот.
Вкупниот број од 124 смртни случаи на новинари во светот го надминува претходниот рекорд во 2007 година од 113 новинари, година кога речиси половина од жртвите се должат на војната во Ирак, според Комисијата за заштита на новинарите.
