Израел: Бен-Гвир сака да стави крај на политиката за враќање на телата на убиените Палестинци

ЕРУСАЛИМ (АА) - Екстремно десничарскиот министер за национална безбедност на Израел, Итамар Бен-Гвир, ја повика израелската Влада да ја запре практиката на враќање на телата на Палестинците обвинети за напади врз Израелците, јавува Анадолу.

Повикот се случи веднаш откако министерот за одбрана, Јоав Галант, рече дека задржувањето на телата на Палестинците не влијае на палестинските вооружени групи.

Израелската Влада во петокот ги предаде телата на тројцата Палестинци убиени во престрелка со израелските сили на окупираниот Западен Брег во март.

Бен-Гвир во својата изјава ја оцени владината одлука како голема грешка што ќе има сериозни последици.

„Сè уште не е доцна да се води моќна и офанзивна безбедносна политика“, додаде Бен-Гвир.

Бен-Гвир во неделата го бојкотираше неделниот состанок на Владата во знак на протест против владините политики, во најновиот јаз меѓу екстремно десничарскиот министер и премиерот Бенјамин Нетанјаху.

Бен-Гвир во четвртокот објави дека шестмина членови на неговата партија во Кнесетот нема да гласаат за одлуките на Владата поради несогласување со нејзините потези.

Тој беше особено лут од, како што смета, слабиот одговор на израелската војска на ракетниот оган од Газа по смртта на затвореникот Хадер Аднан, кој штрајкуваше со глад.