Ahmed Asmar
02 Декември 2023•Ажурирај: 03 Декември 2023
ГАЗА (АА) - Израел вчера забрани камиони со хуманитарна помош да влегуваат во Појасот Газа од египетска страна преку граничниот премин Рафа, продолжувајќи ги разорните напади врз палестинската енклава по завршувањето на еднонеделната хуманитарна пауза, известува Анадолу.
Палестинската организација на Црвената полумесечина соопшти дека израелската страна ги известила нив и другите хуманитарни организации што делуваат во Газа за одлуката која стапила во сила до следното известување.
Во соопштението се додава дека Израел дал и инструкции камионите на палестинската страна на преминот Рафа да се испразнат што поскоро.
„Оваа одлука го влошува опстанокот на народот (палестинскиот) и го зголемува опсегот на предизвици за хуманитарни организации во ублажувањето на страдањата на народот“, се наведува во соопштението.
Израелската војска на 1-ви декември (петок) продолжи со интензивни напади низ Појасот Газа по завршувањето на хуманитарната пауза. Според податоците на Министерството за здравство на Газа, истиот ден се убиени 178 Палестинци, а 589 се ранети.
Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7. октомври.
Оттогаш се убиени повеќе од 15.000 Палестинци, од кои 6.150 деца и над 4.000 жени, објавија здравствените власти на палестинската енклава.
Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибаловиот протокол“ е контроверзна процедура што ја користат израелските одбранбени сили (IDF) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
