Израел очекува првата група заложници да биде ослободена утре

КУДС (АА) - Израелскиот министер за надворешни работи, Ели Коен, денес изјави дека првата група заложници држени од страна на палестинската група Хамас од 7 октомври треба да биде ослободена утре, пренесува Анадолу.

„Според договорот за хуманитарна пауза, постигнат утринава, Израел очекува да ги врати утре првите заложници кои Хамас ќе ги ослободи од Појасот Газа“, изјави Коен за Армиското радио.

Според договорот со посредство на Катар, 50 Израелци кои ги држи Хамас ќе бидат ослободени во замена за 150 палестински затвореници од израелските затвори.

Договорот, посредуван од Катар, Египет и САД, вклучува и четиридневна пауза во борбите и влез на 300 камиони со хуманитарна помош, вклучително и гориво, во Појасот Газа.

Договорот, исто така, овозможува продолжување на паузата и потенцијално ослободување на повеќе деца и жени што ги држат двете страни.

Израел проценува дека најмалку 239 Израелци се држат од страна на Хамас по неговиот прекуграничен напад на 7 октомври.

Израел започна немилосрдни воздушни и копнени напади во Појасот Газа по нападот на Хамас, при што загинаа над 14.128 Палестинци, од кои 5.840 се деца и 3.920 жени, според здравствените власти во енклавата.

Илјадници згради, вклучувајќи болници, џамии и цркви, се оштетени или уништени во воздушните и копнените напади на Израел врз опколената енклава.

Според официјалните податоци, бројот на загинати во Израел изнесува околу 1.200.