Израел планира да ослободи 90 палестински затвореници

ЕРУСАЛИМ (АА) - Израелската затворска служба денес почна да префрла 90 палестински затвореници во затворот Офер близу Рамала, на окупираниот Западен Брег, за да бидат ослободени според договорот за прекин на огнот во Газа, објавија локалните медиуми.

Израелскиот Канал 12 објави дека 78 затвореници ќе бидат ослободени на Западниот Брег, а останатите 12 во Источен Ерусалим.

„Тие ќе бидат ослободени само откако израелските затвореници ќе пристигнат во Израел“, се додава во веста.

Процесот на префрлање на трите заложнички Израелки од страна на Хамас во Црвениот крст во Газа започна како дел од првата фаза на договорот за прекин на огнот, објави Канал 12.

Договорот за прекин на огнот во Газа стапи на сила во неделата во 11:15 часот по локално време (10:15 часот по средноевропско време) по неколкучасовно одложување поради израелските обвинувања дека Хамас го одложува објавувањето на списокот на затвореници што треба да бидат ослободени.

Речиси 47.000 Палестинци се убиени, главно жени и деца, а над 110.700 се ранети во израелската геноцидна војна во Газа од 7 октомври 2023 година.

Во израелските напади исчезнаа повеќе од 11.000 луѓе, со широко распространето уништување и хуманитарна криза која ги однесе животите на многу постари луѓе и деца во една од најстрашните глобални хуманитарни катастрофи досега.

Во ноември, Меѓународниот кривичен суд издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата поради неговата војна против енклавата.