Израелски воени авиони бомбардираа куќа во Рафа, загинаа повеќемина Палестинци

ГАЗА (АА) - Повеќемина Палестинци се убиени и повредени синоќа кога израелски воени авиони бомбардираа куќа во Рафа, на југот на Појасот Газа, јавува Анадолу.

Израелската армија нападна куќа во источниот дел на Рафа, која му припаѓала на семејството Иса, при што имаше жртви, меѓу кои и деца, изјавија очевидци за Анадолу.

Многумина од повредените и убиените, меѓу кои има и деца, беа евакуирани од бомбардираната куќа во болниците во Рафа со помош на медицински тимови и цивилна одбрана.

Очевидци изјавија дека бомбардирањето ја уништило куќата и предизвикало значителна штета на околните куќи и имоти.

Поради недостиг на ресурси, тимовите на палестинската управа се борат да ги исчистат урнатините од бомбардираните домови.

Точниот биланс на загинати и повредени од бомбардирањето на куќата допрва ќе се утврдува.

И покрај предупредувањата од регионалните и меѓународните лидери и организации, Израел планира копнена инвазија на Рафа, во кој се сместени приближно 1,4 милиони раселени Палестинци, кои израелската армија ги избрка во областа под маската на безбедност само за да изврши напади што резултираа со жртви.

Кабинетот на израелскиот премиер Бенјамин Нетанјаху на 15 март објави во соопштение дека тој ги одобрил плановите за воена акција во Рафа и дека армијата се подготвува да ги евакуира жителите, но не прецизираше временска рамка за започнување на офанзивата.

Од 7 октомври 2023 година израелската армија води деструктивна војна во Појасот Газа, што резултираше со десетици илјади цивилни жртви, главно деца и жени, што доведе Израел да се соочи со историски обвиненија за „геноцид“ пред Меѓународниот суд на правдата.