Индискиот премиер повика на дијалог за ставање крај на конфликтите

Индискиот премиер Нарендра Моди денес повика на дијалог и дипломатија за решавање на конфликтите во услови на тековната војна меѓу Русија и Украина и зголемените тензии меѓу САД и Иран, јавува Анадолу.

„Индија доследно го застапува ставот дека решението за сите тензии и конфликти не може да се најде на бојното поле, туку само преку дијалог и дипломатија“, рече Моди во обраќањето на Самитот на Шангајската организација за соработка (ШОС) во 2026 година во Бишкек, главниот град на Киргистан.

„Во денешниот меѓусебно поврзан свет, опсегот на безбедноста стана уште поширок“, рече тој, додавајќи дека кризата на Блискиот Исток покажала дека конфликтот во еден регион не останува ограничен само на тој регион.

„Неговото влијание се чувствува низ целиот свет во енергетската безбедност, поморската трговија и синџирите на снабдување. Земјите од Глобалниот Југ го поднесуваат најголемиот товар од таквите последици“, рече индискиот лидер.

Нагласувајќи дека „светот минува низ неизвесност и нестабилност“, Моди порача на ШОС: „Мора да ја претвориме нашата заедничка географија во заеднички можности и преку нашите колективни напори да донесеме позитивни промени во животот на нашите народи.“

Тензиите меѓу Техеран и Вашингтон остануваат високи откако војната започна со напади врз Иран кон крајот на февруари.

И покрај едногодишните мировни напори предводени од САД, војната меѓу Русија и Украина продолжува и во февруари годинава ја одбележа својата четврта годишнина.