Најмалку 12 повредени во верижен судир на скоро 100 возила во Казахстан

ИСТАНБУЛ (АА) - Најмалку 12 лица се повредени по верижен судир на речиси 100 автомобили во казахстанскиот регион Акмола, поради лошите временски услови, соопшти денес операторот со автопатите во земјата, пренесува Анадолу.

Во соопштението на КазАвтоЈол на Телеграм се вели дека првично биле воведени ограничувања за сообраќајот за сите видови возила поради „влошување на временските услови“ на дел од автопатот што го поврзува северниот град Петропавл со главниот град на Казахстан, Астана.

Се наведува дека додека автопатот бил расчистен по подобрувањето на временските услови, се случил верижен судир во кој учествувале 95 автомобили во дел од автопатот во близина на селото Жанаталап, на околу 27 километри северно од Астана.

„Во несреќата 12 лица се повредени и пренесени во блиската болница“, се наведува и се додава дека заклучно со 21 часот по локално време, 85 од 95 возила се извлечени од сообраќајната несреќа на автопатот Астана-Петропавл.

Во тек е операција за расчистување на автопатот.