Ikrame Imane Kouachi
18 Април 2025•Ажурирај: 18 Април 2025
ВАШИНГТОН / АНКАРА (АА) - Најмалку 74 лица, меѓу кои и пет здравствени работници, се убиени во американските воздушни напади врз јеменското нафтено пристаниште Рас Иса во областа Ал Худајда, соопшти телевизијата на Хуси, Ал-Масирах, јавува Анадолу.
Телевизијата објави дека уште 171 лица се повредени во нападите, при што бројот на жртви би можел дополнително да се зголеми бидејќи спасувачките операции се сѐуште во тек.
Претходно, Ал-Масирах информираше дека „американскиот непријател извршил четири воздушни напади врз подрачјето на Рас Иса“, без да прецизира кои биле точните цели и последици од нападите.
Американската Централна команда (ЦЕНТКОМ) потврди дека го уништила нафтеното пристаниште.
„Денеска, американските сили презедоа акција за елиминирање на овој извор на гориво за терористите Хуси поддржани од Иран и за да ги лишат од нелегалните приходи кои повеќе од 10 години го финансираат нивниот терор низ регионот,“ објави ЦЕНТКОМ на социјалната мрежа X.
Од командата истакнаа дека целта на операцијата била економски да се ослабат Хусите, а не да му се наштети на јеменскиот народ.
„Хусите поддржани од Иран го користат горивото за да ги одржуваат своите воени операции, како средство за контрола и економска корист преку проневера на добивките од увозот. Ова гориво треба легитимно да им припаѓа на граѓаните на Јемен,“ се додава во соопштението.
По нападот, екипите од цивилната заштита и спасувачките тимови продолжуваат со гаснење на пожарот и извлекување на повредените од пристаништето.
Американскиот претседател Доналд Трамп минатиот месец соопшти дека наредил „решителна и моќна воена акција“ против Хусите, а подоцна се заканил дека ќе ги „уништи до темел“.
Од ноември 2023 година, Хусите вршеа напади врз бродови што пловат низ Црвеното и Арапското Море, теснецот Баб ел-Мандеб и Аденскиот залив, како израз на поддршка за Палестинците во Појасот Газа, каде што, според податоци, повеќе од 51.000 луѓе се убиени во израелските напади што траат повеќе од 18 месеци.
Групата ги прекина нападите кога беше постигнат прекин на огнот во Газа во јануари годинава, но повторно ги обнови откако Израел ги продолжи воздушните напади врз енклавата минатиот месец.
