Обилните дождови ги поплавија метро станиците во Њујорк

СКОПЈЕ (АА) – Обилните врнежи од дожд доведоа до сериозни поплави во Њујорк, Соединетите Американски Држави (САД), при што се поплавени неколку метро станици и сообраќајот на повеќе линии е запрен, јавува Анадолу.

Работата на метрото на линиите 1, 2, 3, E, F, M и R беше прекината поради поплави на клучните станици, вклучувајќи ги 96-тата Улица, 28-мата Улица и 34-тата Улица-станица Пен. Патниците се соочија со доцнења и суспензии додека екипите за итни случаи работеа на отстранување на милиони галони вода од системот.

Претходниот ден, слично невреме го погоди Њу Џерси, каде што часови интензивни врнежи предизвикаа изненадни поплави во повеќе делови од сојузната држава.

Гувернерот на Њу Џерси, Фил Марфи, прогласи вонредна состојба во понеделникот вечерта, повикувајќи на внимателност поради најавите за дополнителни врнежи во текот на ноќта.