Руски воздушен напад на пазар во сириски Идлиб: Загинаа девет, ранети се 30 цивили

ИДЛИБ (АА) - Девет цивили загинаа, а 30 се повредени во воздушен напад на руски воени авиони врз зоната на деескалација во Идлиб, Сирија, јавува Анадолу.

Три руски воени авиони полетаа од воздухопловната база „Химејмим“ во Латакија во 10:03 часот по локално време и извршија воздушни напади врз пазар на зеленчук во Џиср ал-Шугур во Идлиб, центарот на градот и во селото Бејнин.

Според Сириската цивилна одбрана (Бели шлемови), во нападот загинале девет цивили, а 30 се повредени.

Се стравува дека бројот на мртви би можело да се зголеми.

За време на состанокот во Астана во 2017 година, Туркије, Русија и Иран се договорија за формирање четири „зони на деескалација“ во подрачјето што не е под контрола на силите на режимот на Асад. Меѓутоа, сирискиот режим и терористите поддржани од Иран и Русија ги продолжија нападите и зазедоа три од четирите региони и тргнаа кон Идлиб.

Иако Туркије постигна дополнителен договор за зајакнување на примирјето со Русија во септември 2018 година, нападите се интензивираа во мај 2019 година. Прекинот на огнот главно се одржува откако Туркије и Русија постигнаа нов договор на 5 март 2020 година.

Околу два милиона цивили, кои бегаа од нападите во периодот од 2017 до 2020 година, побегнаа во регионите во близина на турската граница.