Beyza Binnur Dönmez
18 Март 2025•Ажурирај: 18 Март 2025
Сериозниот недостиг на медицински средства и лекови во Појасот Газа ја прави сѐ потешка негата која е неопходна за спасување животи, соопшти денес Меѓународната федерација на здруженијата на Црвен крст и Црвена полумесечина (IFRC), јавува Анадолу.
Портпаролот Томасо Дела Лонго на брифингот на Обединетите нации (ОН) во Женева изјави дека медицинските установи се „преплавени“ од бројот на пациенти и дека залихите за соодветна медицинска нега се сѐ помали.
„Од почетокот на март, во Газа не влегол никаков конвој со хуманитарна помош, ниту гориво, што дополнително го парализира здравствениот систем. Итните возила остануваат без гориво, што ја ограничува нивната можност да реагираат на итни случаи. Тимовите на Палестинската Црвена полумесечина работат на проценка на влијанието од недостигот на гориво врз нивната способност да стигнат до оние на кои им е потребна помош“, рече тој.
„Недостатокот на медицински средства и лекови во болниците и клиниките ја прави негата сѐ потешка“, нагласи Дела Лонго.
Тој апелираше за продолжување на прекинот на огнот, како и за безбеден и непречен проток на хуманитарна помош, вклучително и медицински средства, храна и гориво. Исто така, повика на итен прекин на непријателствата, заштита на цивилите и хуманитарните работници, како и безусловно ослободување на сите заложници.
Израелската Армија рано утринава ја бомбардираше Газа, при што се убиени повеќе од 400 Палестинци, а стотици беа повредени, со што беше прекршен договорот за прекин на огнот со палестинската група Хамас, кој стапи на сила на 19 јануари.
Фотографиите од Газа покажуваат дека мнозинството жртви се цивили, вклучувајќи жени и деца, чии домови се уништени во нападите.
Во израелските напади, што започнаа од октомври 2023 година, убиени се над 48.500 Палестинци, повеќето жени и деца, а Газа е оставена во урнатини.
Во ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
