Украинскиот министер за надворешни работи, Кулеба: „Средбата ќе се одржи благодарение на Чавушоглу“

КИЕВ (АА) - Украинскиот министер за надворешни работи, Дмитро Кулеба, истакна дека планираната средба со рускиот министер за надворешни работи, Сергеј Лавров на 10 март, ќе биде реализирана, пред сѐ, благодарение на турскиот министер за надворешни работи, Мевлут Чавушоглу, пренесува Агенција Анадолија (АА).

Според вестите на украинската новинска агенција „Униан“, министерот Кулеба во емисија во живо истакна дека ќе седне на преговарачка маса со Лавров.

„Средбата, која е планирана да се одржи на 10 март, ќе се одржи првенствено благодарение на турскиот министер за надворешни работи, Мевлут Чавушоглу. Не знам дали [претседателот Реџеп Таип] Ердоган го убедил [рускиот претседател Владимир] Путин или пак Чавушоглу го убедил Лавров, но средбата ќе се одржи“, нагласи Кулеба.

Истакнувајќи дека Лавров веќе две години избегнува каков било контакт со него билатерално или во формат на Нормандискиот квартет, Кулеба рече: „Сега тој одеднаш се согласи, можеби сака да пренесе нешто. Ќе сослушаме, но ќе разговарам со него свесен дека тој е еден од архитектите на агресијата против Украина.“

На прашањето дали окупираните Крим и Донбас ќе бидат на дневен ред на средбата, Кулеба рече дека неговата земја не е во позиција да се откаже од ништо во преговорите.