Beyza Binnur Dönmez
25 Октомври 2024•Ажурирај: 28 Октомври 2024
ЖЕНЕВА (АА) – Мировната мисија на Обединетите нации во Либан (УНИФИЛ) соопшти дека безбедносната ситуација во јужен Либан е исклучително предизвикувачка и покрај обемните мерки преземени за заштита на општата сигурност и безбедноста на мировниците, јавува Анадолу.
Во соопштението се наведува дека два тима за медицинска помош, кои се состанале во Јарин за пренесување на пациент, се нашле под оган од непознато потекло во средата наутро.
„Едно возило е онеспособено и е оставено на местото на инцидентот“, се вели во соопштението.
Истиот ден во вечерните часови медицинската установа на локацијата УНИФИЛ во Беит Леиф била погодена од граната или ракета од непознато потекло, предизвикувајќи оштетување на установата.
Во соопштението се наведува дека уште две гранати или ракети, исто така од непознато потекло, паднале во близина на позицијата УНИФИЛ во Кафер Чуба, предизвикувајќи оштетувања на станбените простории и засолништата.
„Сите членови на мисијата беа во засолништата и никој од нив настрада во овие инциденти. Ги потсетуваме сите актери на нивната обврска да избегнуваат акции што ги ставаат во опасност мировните сили или цивилите. Продолжуваме да ги повикуваме сите актери вклучени во конфликтот да ги решат своите несогласувања на преговарачка маса, преку политички и дипломатски решенија, а не со насилство. УНИФИЛ останува на терен и е подготвен да го поддржи тоа“, порачаа од УНИФИЛ.
Израелските напади врз УНИФИЛ предизвикаа и меѓународна осуда.
УНИФИЛ дејствува меѓу реката Литани во јужен Либан и Сината линија, која служи како граница со Израел, како дел од мандатот според Резолуцијата на Советот за безбедност на ОН за одржување на безбедноста во регионот.
Израел започна интензивни воздушни напади врз Либан минатиот месец, тврдејќи дека нападите се насочени врз позициите на Хезболах. Ескалацијата на тензиите во регионот се случува во време на брутални израелски напади врз блокираниот Појас Газа, кои започнаа на 7 октомври минатата година.
