Vesna Besic
25 Декември 2023•Ажурирај: 26 Декември 2023
ГАЗА (АА) - Северниот дел на Газа, кој е под интензивни израелски напади од 7 октомври, е претворен во урнатини, јавува Анадолу.
Палестинците се борат за опстанок во уништената Беит Лахја во Газа. Некои не сакаат да ги напуштат своите домови иако од нив не остана ништо. Тие не заминуваат и покрај израелските барања да ја напуштат областа.
Екипата на Анадолу ја сними моменталната ситуација во оваа област на северот на Газа. Откако израелската војска влезе и излезе од регионот, градот се претвори во град на духови. Само неколку жители останаа во нивните уништени домови.
Еден од жителите изјави дека 80 отсто од куќите во Беит Лахја биле уништени како резултат на израелските напади.
Израел започна со напади врз Појасот Газа по прекуграничниот напад на Хамас на 7 октомври, и оттогаш се убиени најмалку 20.424 Палестинци, главно жени и деца, а 54.036 се ранети.
Израелскиот напад го остави Појасот Газа во урнатини со половина од станбениот фонд оштетен или уништен, а околу два милиони луѓе се раселени во густо населената палестинска енклава поради недостиг на храна и чиста вода.
Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.
