Mücahit Aydemir
25 Декември 2023•Ажурирај: 26 Декември 2023
КУДС (ЕРУСАЛИМ) - Палестинските христијански театарски актери настапија по повод Божик и на бината ја одиграа претставата под наслов „Надежта се раѓа од урнатините на болката“, претстава која го прикажува Исусовото раѓање во услови на современа Палестина, известува Анадолу.
Христијаните низ светот во радост и изобилство го прославуваат Божик покрај украсените и празнично осветлени улици и плоштади, но тој празник во Палестина, каде што е роден Исус Христос, минува во сенка на масакрите и нападите што Израел продолжува да ги извршува во Појасот Газа.
Црквите во Палестина ги откажаа прославите и церемониите, ограничувајќи ја прославата на Божик на исклучиво верски дел.
Актерите на Културниот центар „Ал Себил“, кој е во сопственост на палестинските христијани, настапија во театарот „Нотр Дам“ во окупираниот источен Ал Кудс (Ерусалим) и ја изведоа претставата „Емануел“, која го прикажува раѓањето на Исус Христос во денешните услови на израелска окупација и напади врз Палестина.
Претставата е изведена под наслов „Надежта се раѓа од урнатините на болката“, а режисерот Имад Атала за Анадолу рече дека станува збор за раѓањето на Исус Христос во условите во кои Палестинците живеат денес.
„Нашата порака до целиот свет е љубов и мир. Без разлика што ни се случува, ние ќе останеме во својата земја. Ние сме деца на оваа земја“, порача Атала.
Надбискупот на Грчката православна црква, Себастија Атала Хана, кој ја гледаше претставата, го честиташе Божик на христијанскиот свет и повика на акција за ставање крај на нападите врз Појасот Газа.
„Од целиот свет и од сите слободни луѓе бараме да преземат итни и ефикасни мерки за да се запре оваа војна“, рече Хана.
Истакнувајќи дека Божик во Палестина оваа година е дочекан во тажна и болна атмосфера, Хана упати молитва до Господ за запирање на војната и на страдањето од недолжните цивили во Појасот Газа.
