Enes Taha Ersen
25 Декември 2023•Ажурирај: 26 Декември 2023
ИСТАНБУЛ (АА) - Израелските напади на новинарите „за да се спречи вестите да излезат од Појасот Газа“ претставуваат воено злосторство, смета заменик-генералниот секретар на Меѓународната федерација на новинари (МФН), Тим Досон, известува Анадолу.
Зборувајќи за Анадолу за големиот број убиени новинари во израелските напади на Појасот Газа, Досон рече:
„Јасно е дека ситуацијата во Газа е ужасна за сите. Недостигаат храна, вода, гориво и засолништа. Околу 7 или 8 отсто од сите новинари во енклавата ги загубија животите, а речиси сите загубија членови од своите семејства.“
Зборувајќи за големиот број убиени новинари во Појасот Газа, Досон истакна дека тоа е „срцепарателно и страшно“.
„Меѓународното право бара вооружените сили да ги третираат новинарите како цивили и да дадат сѐ од себе да ја обезбедат нивната сигурност. Намерното убивање новинари е воено злосторство“, нагласи Досон.
Напоменувајќи дека нема јасно разбирање за причините што стојат зад таквите израелски акции, Досон рече дека новинарите во Газа со кои разговарал „веруваат дека се цел“.
„Имајќи го предвид целосно непропорционалниот број на смртни случаи меѓу новинарите, тешко е да се отфрли оваа можност. Израел и Египет не им дозволуваат на меѓународните новинари да влезат во Газа“, рече Досон.
Тој порача дека новинарите од Газа покажале исклучителна истрајност во продолжувањето на известувањето „со малку храна или вода, без гориво и главно живеат во шатори“.
„Мора да кажам дека сум најголем почитувач на нивната работа. Израелците изгледа прават сѐ што е во нивна моќ да спречат вестите да излезат од Појасот Газа“, смета Досон.
Го повика Меѓународниот кривичен суд (МКС) „да ја забрза истрагата за убиствата на новинарите во Палестина“.
Напоменувајќи дека ИФД, исто така, „поднела жалба до МКС поради смртта на новинарите од страна на израелските одбранбени сили", Досон изрази „надеж дека тоа би можело да даде план за поширока истрага за околностите во кои се убиени толку новинари во Газа“.
