Шефот на ОН повика на итен прекин на воената операција на Израел врз Западниот Брег

ВАШИНГТОН (АА) - Израел мора веднаш да ја прекине својата голема воена офанзива врз окупираниот Западен Брег, изјави денес генералниот секретар на ОН, Антонио Гутереш, откако 11 Палестинци беа убиени, а неколкумина повредени, јавува Анадолу.

Гутереш остро ја осуди загубата на животи, вклучително и на деца и повика на итно прекинување на овие операции.

„Генералниот секретар го повикува Израел да ги почитува релевантните обврски според меѓународното хуманитарно право и да преземе мерки за заштита на цивилите и обезбедување сигурност. Тој ги повикува безбедносните сили да покажат максимална воздржаност и да користат смртоносна сила само кога е строго неизбежно да се заштитат животи“, рече неговиот портпарол Стефан Дујарик.

Воената кампања на Израел е најголема на Западниот Брег од 2002 година за време на Втората интифада. Рации имаше на северот на окупираната територија, вклучително и во областите Наблус, Тулкарем, Џенин и Тубас.

Израел користи две армиски бригади, хеликоптери, беспилотни летала и булдожери, објави израелскиот дневен весник „Једиот Ахронот“.

Гутереш нагласил дека повредените мора да имаат пристап до медицинска нега, а хуманитарните работници мора да може да дојдат до сите на кои им е потребна помош.

„Овие случувања само ја поттикнуваат веќе ескалираната состојба на окупираниот Западен Брег и дополнително ја поткопуваат палестинската управа“, рече Дујарик.

„На крајот, само завршувањето на окупацијата и враќањето на значаен политички процес со кој ќе се воспостави решение за две држави ќе донесе крај на насилството. Обединетите нации ќе продолжат да работат со сите страни за оваа цел, барајќи деескалација на сегашната ситуација и поттикнување стабилноста во регионот“, додаде тој.

Меѓународниот суд на правдата на 19 јули ја прогласи за незаконска повеќедецениската окупација на Палестина од страна на Израел и побара евакуација на сите населби на Западниот Брег и Источен Ерусалим.