Јапонија: Бројот на загинати во земјотресите се искачи на 126

Бројот на загинати во земјотресите што ја погодија централна Јапонија на Нова година се искачи на 126, објавија локалните медиуми, пренесува Анадолу.

Властите, исто така, соопштија дека продолжува потрагата по над 200 лица во префектурата Ишикава кои сè уште се водат како исчезнати веќе шест дена од земјотресот, објави јавната телевизија НХК.

Во понеделникот силен земјотрес со јачина од 7,6 степени според Рихтеровата скала ја погоди префектурата Ишикава на Јапонското Море, уништувајќи десетина згради и предизвикувајќи огромни штети на патиштата во регионот, проследени со помали земјотреси.

Последователните потреси, исто така, продолжија откако силен земјотрес со јачина од 5,4 степени според Рихтеровата скала ја погоди префектурата во саботата наутро, додека властите ги повикуваат жителите да бидат внимателни.

Локалните власти, исто така, имаат проблеми со доставувањето на хуманитарна помош во погодените области бидејќи патиштата остануваат оштетени и често блокирани, додека илјадници домови немаат струја.

Околу 33.000 луѓе се евакуирани во околу 370 засолништа во Ишикава, која се соочи со најголеми човечки загуби и оштетувања на инфраструктурата.

Властите, исто така, предупредија дека за време на викендот се очекуваат врнежи од дожд и снег низ регионот Хокурику и префектурата Ниигата, што може да предизвика повеќе лизгање на земјиштето и студени бранови во погодените области.