Јеменските Хуси тврдат дека нападнале американски брод во Црвеното Море

САНА (АА) - Јеменските бунтовници Хуси денес соопштија дека нападнале американски брод што му обезбедувал поддршка на Израел во Црвеното Море, јавува Анадолу.

„Во нападот беа вклучени голем број балистички и поморски ракети и беспилотни летала“, се вели во соопштението на Хусите.

Јеменската група соопшти дека нападот „бил првичен одговор на минатомесечниот американски напад врз нејзините сили во Црвено Море“.

Минатиот месец Хусите соопштија дека 10 нивни припадници биле убиени во американски напад врз три нивни чамци во Црвено Море.

„Нема да се двоумиме соодветно да се справиме со сите непријателски закани како дел од правото да ги браниме нашата земја, нашиот народ и нашата нација“, соопштија Хусите.

Тие значително го засилија своето учество во конфликтот во Појасот Газа со нападите врз бродови во Црвено Море.

Групата предупреди дека ќе ги нападне сите бродови што пловат кон Израел. Се наведува дека нападите се за поддршка на Палестинците додека се соочуваат со израелската „агресија и опсада“ во Газа.

Црвеното Море е еден од најчесто користените поморски патишта во светот за испорака на нафта и гориво.

Минатиот месец американскиот секретар за одбрана, Лојд Остин, најави создавање на мултинационална мисија - операција „Просперитет Гардијан“ - за да им се спротивстави на нападите на Хусите врз трговските бродови на Црвеното Море.