Fatih Erel
08 Јануари 2025•Ажурирај: 08 Јануари 2025
ИСТАНБУЛ (АА) - Поранешната НБА-ѕвезда Двајт Хауард рече дека за малку ќе го исфрлеле од лигата поради неговата објава „Слобода за Палестина“ и истакна дека му бил вршен притисок да ја избрише објавата, известува Анадолу.
Хауард за време на една активност на која учествувал рече: „Кога играте во НБА, има многу работи што сакате да ги кажете, можете да ги кажете, но ако го направите тоа, знаете дека ќе има последици. Можете да бидете во голема неволја. На пример, кога играв за Хјустон Рокетс пред неколку години, објавив твит ‘Слобода за Палестина’ и поради тоа за малку ќе ме исфрлеа од лигата“.
39-годишниот кошаркар, кој се закити со шампионска титула во НБА, изјави:
„Објавив твит ‘Слобода за Палестина’. За помалку од 10 минути откако го објавив ова, комесарот на НБА, менаџерите, луѓето кои работеа во мојата фондација во тоа време, се јавија и ми рекоа: ‘Треба да го избришеш овој твит, треба да го отстраниш. На тоа јас прашав ‘Што направив толку лошо? Може ли некој да ми објасни?’“
Раскажувајќи дека имал потешкотии да ги изрази своите мислења во периодот кога играл во НБА, Хауард истакна:
„Кога бев во НБА, ако кажев премногу, ако кажев нешто, знам дека сум на место каде што можеби никогаш повеќе нема да добијам работа. Помислувате ‘Треба да си молчам’. Но станува многу тешко да го направите тоа кога ќе се соочите со толку многу ситуации.“
Хауард, кој во својата кариера има освоено една шампионска титула во НБА-лигата и 8 пати беше избран во Олстар тимот, важи за еден од најдобрите одбранбени играчи на сите времиња.
