Ердоган: Турција нема да дозволи поделба на Сирија

АНКАРА (АА) - Претседателот на Турција, Реџеп Таип Ердоган истакна дека Турција не се согласила на поделба на Сирија во минатото и дека со сигурност нема да се согласи на тоа ниту денес, ниту утре, известува Анадолу.

Турскиот претседател по состанокот на кабинетот даде изјава за медиумите.

Осврнувајќи се на нападите што Израел изминатите денови ги започна врз територијата на Сирија, претседателот Ердоган истакна:

„Израел ги користи Друзите како изговор за да ги премести своите бандити во соседна Сирија последните 2 дена. Како што вчера не се согласивме на поделба на Сирија, сигурно нема да се согласиме на тоа ниту денес, ниту утре“.

За ситуацијата во Сирија и како тоа може да се отслика врз регионот, Ердоган рече:

„Стабилна Сирија ќе генерира стабилност за сите соседни земји. Во спротивно, сите ќе го носат товарот на тоа“.

Тој посочи дека со внимание ги следат сите случувања во Сирија, одржуваат комуникација со колегите и додаде дека ќе продолжат да го прават тоа и во иднина.

Осврнувајќи се на принципот на кој дејствува Израел во регионот и репрекусиите што ги извршува врз соседните земји, претседателот на Турција продолжи со зборовите:

„Оние кои бараат сигурна иднина преку угнетување и масакр никогаш не треба да заборават дека ние сме сопственици на оваа земја и дека сме тука за да останеме“.

Ердоган истакна дека фундаменталната политика на Турција е да го сочува територијалниот интегритет, националното единство, унитарната структура и мултикултурниот идентитет на Сирија, која е нејзин сосед.

„Немаме злоба кон никого, ниту завист, ниту непријателство. Не кршиме ничии права, закони или суверенитет. Сакаме само мир“, посочи Ердоган и додаде:

„Преку нашата чесна надворешна политика, мировните напори и дипломатските ангажмани, Турција стои на страната на мирот и хармонијата“.