Тандури направени од глина и козјо влакно го продолжуваат традиционалниот вкус на лебот

Жените во населбата Палас во областа Сарјоглан во турскиот град Кајсери со традиционален начин на изработка на тандури од глина и козјо влакно го одржуваат старото мајсторство, а со продажбата на овие печки придонесуваат и за семејниот буџет.

Жените кои живеат во населбата Палас со доаѓањето на летната сезона започнуваат со изработка на тандури. Тие ја мешаат специјалната земја богата со глина со козјо влакно и ја претвораат во кал, а за еден тандур им се потребни од 15 до 20 дена.

Педесет и шестгодишната Гултен Ѓошкун, една од жените кои изработуваат тандури, за дописникот на АА рече дека изработката ја научила од својата баба и дека продолжила со оваа работа и по стапувањето во брак.

Таа рече дека вкусот на лебот печен во тандур е поинаков.

„Оној што ќе го јаде ова, не може да јаде леб што се продава во продавниците.“

Раскажувајќи дека тандурите ги изработува и ги продава заедно со својата тетка, Ѓошкун посочи дека во специјалната глинена земја додаваат козјо влакно за да биде поцврста, а земјата што ја разредуваат со вода и ја претвораат во кал ја газат со нозете една недела.

Таа објасни дека ѝ даваат форма на калта, секој ден прават по еден слој од тандурот и ја измазнуваат неговата површина со камења наречени „ну таши“.

„Внатрешноста на тандурот мора да биде мазна. Кога е мазна, лебот убаво се пече“, рече Ѓошкун.

Наведувајќи дека во нивното село од 10 до 15 лица знаат да изработуваат тандури, но дека младите не покажуваат интерес за овој занает, Ѓошкун посочи дека тандурите што ги прават можат да се користат долги години.

Ѓошкун рече дека изработката на тандури е тешка работа:

„Нашата работа е потешка од работата на градежен работник. Градежниот работник не се мачи толку многу како нас. Луѓе доаѓаат од Кајсери, од околината и од сите места за да купат тандури. Тандурите што ги правам траат долго. Тандурот што јас го направив го користев 20 години. Малите тандури ги продаваме за 4-5 илјади лири, а големите за 7 илјади лири.“

Ѓошкун истакна дека летната сезона ја избираат за производство на тандури, дека до септември изработуваат околу 15 тандури, а секој од нив тежи приближно 200 килограми.

Објаснувајќи дека со изработката на тандури придонесуваат за семејниот буџет, Ѓошкун рече:

„Придонесуваме за домашната економија, ги трошиме парите за себе, им даваме на внуците.“

Рукије Узун, која пече леб во тандур, рече дека лебот печен во тандур е многу вкусен, додавајќи дека лебот што го пече на секои три недели го чува во замрзнувач и потоа го консумира.

Узун кажа дека станува рано наутро и го пали огнот во тандурот, истакнувајќи дека продолжува да го подготвува лебот со вкус што го знае уште од детството.