Турскиот претседател ќе присуствува на Самитот на Д-8 во Египет

Турскиот претседател Реџеп Таип Ердоган утре ќе отпатува за Египет за да присуствува на 11. Самит на Осумте во развој (Д-8) Организацијата за економска соработка, изјави директорот за комуникации при турското Претседателство, Фахретин Алтун, јавува Анадолу..

Алтун на X истакна дека Ердоган ќе се обрати на самитот, кој ќе се одржи под темата „Инвестирање во младите и поддршка на малите и средни претпријатија: Обликување на идната економија“.

Ердоган се очекува да учествува и на специјалната сесија која ќе се фокусира на ситуацијата во Палестина и Либан, соопшти Алтун.

Тој додаде дека турскиот претседател ќе одржи и билатерални разговори со другите лидери кои присуствуваат на самитот за глобалните и регионални прашања, со фокус на Сирија и Палестина.

Земјите членки на Д-8 се Иран, Туркије, Пакистан, Бангладеш, Индонезија, Малезија, Египет и Нигерија. Организацијата е формирана во 1997 година преку Истанбулската декларација на Самитот на шефови на држави.