Фидан: Секој обид за поделба или дестабилизација на Сирија е директна закана за Турција

ИСТАНБУЛ (АА) - Турскиот министер за надворешни работи, Хакан Фидан, денес изјави дека Турција ќе го смета секој обид за поделба или дестабилизација на Сирија како директна закана за нејзината национална безбедност и дека ќе интервенира во тој случај, јавува Анадолу.

„Израел води политика со која сака да го ослаби регионот и да го задржи во хаос“, рече Фидан на заедничката прес-конференција со неговата колешка од Салвадор, Александра Хил, во главниот град Анкара.

Фидан го обвини Израел дека не сака стабилна држава во своето соседство и дека има за цел да ја подели Сирија.

На 13 јули избувнаа судири меѓу бедуинските арапски племиња и вооружените групи Друзи во Сувејда. Насилството ескалираше, а потоа следуваа израелски воздушни напади, вклучително и врз сириските воени позиции и инфраструктура во Дамаск.

Како изговор за своите напади Израел ја наведе „заштитата на заедницата на Друзите“.

Меѓутоа, повеќето лидери на Друзите во Сирија јавно го отфрлија секое странско мешање и ја потврдија својата посветеност на обединета сириска држава.

Како одговор на ескалацијата на насилството, сириската Влада објави четири договори за прекин на огнот во Сувејда, од кои последниот беше постигнат во саботата.

Новата сириска Влада работи на враќање на редот низ целата земја уште од соборувањето на поранешниот претседател Башар ал-Асад на 8 декември 2024 година.