Вработеноста во Германија опадна во 2025 година, првпат од 2020

ИСТАНБУЛ (АА) – Вкупната вработеност во Германија лани се намали за првпат од 2020 година, како резултат на продолжениот економски застој и демографските промени во земјата, јавува Анадолу.

Податоците на државната статистичка служба Дестатис, објавени денес, покажуваат дека вкупниот број вработени во 2025 година изнесувал околу 46 милиони лица, што е намалување за 5.000 во споредба со претходната година, која беше на највисоко ниво од обединувањето на Источна и Западна Германија во 1990 година.

„Со исклучок на пандемиската 2020 година, бројот на вработени лица континуирано растеше од 2006 година. Сепак, темпото на раст на вработеноста значително забави од почетокот на 2024 година“, соопшти Дестатис.

Невработеноста се зголеми од 3,1 % во 2024 година на 3,5 % минатата година, според неприспособени податоци. Бројот на невработени лица порасна за 161.000 и достигна 1,7 милиони.

Вкупната работна сила достапна на пазарот на трудот се зголеми за 156.000 лица минатата година и изнесуваше 47,5 милиони.

Дестатис наведува дека растот на вработеноста, како и во претходните години, се должи на приливот на странски работници и зголеменото учество на домашното население на пазарот на трудот. Повисоки стапки на вработеност се забележани кај повозрасните лица и кај жените.

Најголем придонес за вработеноста минатата година имаше услужниот сектор, со раст од 0,5 % или 164.000 лица.

Од друга страна, значителни загуби на работни места се регистрирани во производствениот и градежниот сектор. Бројот на вработени во индустријата, вклучително и енергетиката, се намали за 1,8 % или 143.000 лица и изнесуваше 7,9 милиони.

Вработеноста во градежниот сектор се намали за 23.000 лица и падна на 2,6 милиони.