Во Кина регистрирани 18 нови случаи на Ковид-19, во Јужна Кореја 17

АНКАРА (АА) – Во Кина, во изминатите 24 часа откриени се 18 нови случаи на новиот вид коронавирус, Ковид-19, додека во Јужна Кореја детектирани се 17 нови случаи, пренесува Агенција Анадолија (АА).

Кинеската Национална комисија за здравство соопшти дека во земјата во последните 24 часа се регистрирани 18 нови случаи на вирусот. Смртни случаи не се евидентирани.

Во соопштението се нагласува дека во последните 24 часа од вкупниот број на новозаразени, 9 се евидентирани во главниот град Пекинг. Со тоа, во Пекинг од 11 јуни регистрирани се вкупно 236 случаи на Ковид-19.

Во Кина вкупниот број на потврдени случаи е зголемен на 83.396, додека бројот на смртни случаи на 4.634. Во земјата од вирусот досега се излекуваа 78.413 лица.

Кинеските медиуми соопштија дека поради зголемувањето на бројот на случаите во Пекинг, дневниот капацитет на тестови за Ковид-19 од 100.000 е зголемен на 230.000.

За да се спречи ширењето на епидемијата во главниот град, наставата привремено е прекината, а исто така прекинати се и колективните спортски и културни активности.

- Во Јужна Кореја вкупниот број на заразени со Ковид-19 достигна 12.438 -

Во Јужна Кореја, од 26 мај, за прв пат бројот на дневни случаи на Ковид-19 е намален под 20.

Од Центарот за контрола и превенција на болести на Јужна Кореја соопштија дека во последните 24 часа се идентификувани 17 нови случаи на Ковид-19, од кои 7 во главниот град Сеул и околината.

Од Центарот е истакнато дека бројот на заразени со Ковид-19 во земјата е зголемен на 12.438, а дека од коронавирусот досега починале 280 лица. Во земјата вирусот Ковид-19 го победија 10.881 лице, додека во моментот има 1.277 активни случаи.

Во последниот период најголем број случаи на Ковид-19 се забележани кај граѓаните кои посетувале ноќни клубови, цркви, кај лица што работеле во магацин на една компанија за електронска трговија и кај продавачите на пазарите.