Белата куќа се огласи по тврдењата на Бајден дека има рак

ВАШИНГТОН (АА) - Белата куќа се огласи и го појасни очигледното тврдење на американскиот претседател Џо Бајден дека боледува од рак, велејќи дека тој мислел на дијагнозата за рак на кожата што ја добил пред да стане претседател, а која е надмината, пренесува Агенција Анадолија (АА).

Говорејќи за климатските промени во американската сојузна држава Масачусетс, Бајден потсети дека растел покрај неколку нафтени рафинерии во неговата родна држава Делавер, велејќи дека тие биле одговорни за огромното загадување на областа.

„Затоа јас и многу други луѓе со кои пораснав имаме рак, и затоа Делавер најдолго време имаше највисока стапка на рак во целата земја“, рече тој, нагласувајќи ја потребата за оддалечување од фосилните горива.

Портпаролот на Белата куќа, Ендрју Бејтс, рече дека претседателот мислел на немеланомни карциноми на кожата кои биле отстранети пред да ја преземе функцијата.

Во резимето на здравствената состојба на претседателот објавено во ноември се вели дека на Бајден пред неговото стапување на функцијата „му се отстранети неколку локализирани, немеланомни карциноми на кожата“, додавајќи дека „во овој момент нема сомнителни регии за рак на кожата“. Се додава дека не биле потребни биопсии.

„На ова мислеше претседателот“, напиша Бејтс на Твитер.