Виенската палата Шонбрун: Една од најимпресивните барокни архитектонски градби во Европа

ВИЕНА (АА) – АЈШЕ ХУМЕЈРА АКЃУН -

Првобитно изградена како ловечки замок со огромен парк, палатата Шонбрун е надградена до сегашната големина во средината на 18. век и беше летна и главна резиденција на царското семејство и дворјаните, пишува Анадолу.

„Schloss Schonbrunn“ (Палатата Шонбрун), летната палата на Хабсбуршката династија, која со векови владееше со различни европски земји, секоја година е домаќин на стотици илјади посетители како една од важните атракции на Виена.

Палатата, чија изградба е започната во 1743 година, и паркот во кој се наоѓа го привлекуваат вниманието на љубителите на уметноста и историјата како една од највпечатливите барокни архитектонски градби во Европа.

Секој салон, секоја сала на замокот ги раскажува приказните за неговата историја - за атмосферата, начинот на живот и погледите на светот од царската ера.

Царот Максимилијан II во 1569 година дал наредба да се изгради кралска ловечка куќа во поплавената долина на реката Виен, чие оградено ловно подрачје било полно со фазани, патки, елени и диви свињи, но и со егзотични птици како што се пауните.

Во текот на следниот век ова подрачје било познато под името Шонбрун, по артешкиот бунар од кој се црпела вода за замокот.

Ова ловно подрачје особено го сакала втората сопруга на Фердинанд II, Елеонора Гонзага, која поминувала многу време ловејќи таму. Таа додала оранжерија и палата во ловечкото подрачје, која се градела од 1638 до 1643 година.

Палатата, која со својата архитектура и дизајн ја симболизира моќта и влијанието на Хабсбуршката династија врз европската историја, подоцна целосно функционира како летна резиденција на царството.

Во палатата, која има вкупно 1.441 соба, за посетителите се отворени само 45 соби и делови од градината.

Палатата е целосно уништена за време на Втората опсада на Виена во 1683 година.

Дури од 1743 година, за време на владеењето на царицата Марија Терезија, со проектите на архитектите Николаус Пакаси и Јохан Фердинанд Хецендорф фон Хоенберг, го добила денешниот изглед.

Градините со Глориета, фонтаната на Нептун и римските урнатини исто така се преобликувани во овој период.

Палатата, заедно со градината околу неа, во 1996 година се вклучени во листата на УНЕСКО за светско наследство во Европа.

Кон крајот на 19. век, во непосредна близина на зоолошката градина изградена е импресивна куќа за палми од стакло и железо.

Волфганг Амадеус Моцарт го има одржано својот прв концерт во Салата на огледалата на палатата Шонбрун кога имал само шест години.